THEMAKRANT FEESTEN EN PARTIJEN (editie 27, januari 2026)

door Rinus Willemsen

Verjaoren en nog wel op schoolreis gaon. Dà vergeet ‘k nôôit nie mêêr. ‘k Zat in de dèrde klasse bie mêêster Van de Velde.

Tracteren in de bus op smoeletrekkers. ’t Was miin gedacht. Die morgen êêst en vooral om krèntenkoeken bie de buurman, bakker Lijbaart. Allicht, deze koeken, die ‘ôôren toch ommerst bie ’n verjaordag. Net als ’n tulband mee zô’n klein bolletje d’r op. En wit gesnêêuwd mee poeiersuker.  Saomen mee de koeken nam ‘k een zak smoeletrekkers mee uut de wienkel.

Alles goeng in m’n tasje en ‘ôôvèèrdig stappende kik nao de Markt. Dao kwam altied onze bus as me op schoolreis goengen.

Me waoren nog mao net buuten de bebouwde kom, op de Noorddiek, toen m’n tasje opengieng. “Nee, nee”, zei de mêester, “straks kan je tracteren.” Toen bin ‘k mao an m’n èèste koeke begonnen. Tussen d’ Oôfplaote en Bresjes was een lange rechte weg. Daor wier ik toegezoengen. Ik stoeng in ’t gangpad, bie de chauffeur. En die zoeng ook mee. Nog altied moen ‘k daoran dienken as ‘k op dien weg riej. Noe nie mêêr in een grôôte bus, maor in een klein buurtbusje. Voo me in Bresjes de bôôt opreejen,  zat iederêên mee ’n smoeletrekker in z’n mond. (Die waoren trouwens in Bresjes gemaokt in die daogen!) ’t Was ’n biezondere verjaordag. Mee ’n bezoek an Miniatuur Walcheren. Dao zag ik ’n treintje riejen van Vlissiengen nao Middelburg. Mee slabôômen, knipperlichten en ’n belle die wèrkende. En ’n brandweer, die een brandende schuure mao bleef blussen. Mènsen nog an toe: wà was dà schôône. Maor ’t môôiste van dien dag was de roltrap bie V en D in Vlissiengen. Van êêl die wienkel ‘èn ‘k niks anders gezien dan die roltrap. Voo miin was ’t net een speeltuin. Joenges nog an: wat ’n cadeau! Nog nôôit nie gestaon op zo’n diengk. En ’t kostende nog glad niks ook!

D’n andere dag was t’r tulband. Mee ’n bolletje d’r op. En vee poeiersuker.

foto: Rinus Willemsen. | foto Margreeth Ernens