THEMAKRANT SCHOOL (editie 14, SEPTEMBER 2022)

door Rinus Willemsen

‘k Zat in de vuufde klasse bie mêêster Maas, die toen an z’n leste jaor bezig was.

’t Was voorjaor. Op ’n middag vertellende die over zwaoluws. Allicht wisten wudder wao d’r zwaoluws zaoten onder de goote of overstekken van ‘uuzen. Me konnen d’r bots ’n rijtje opnomen. ,,Bie Leen de Die, bie Magnus en Dierixs’’, om d’r maor ’s ’n paor mènsen in de buurte te noemen. Je zag dat op straote ee. Dao lag ommerst altied een ‘ôôpje stont.

Verjaogen

Sommige mènsen, zoals bie Van Vooren, dao lag niks. Die ‘aon onder de nisten schietplankjes gemaokt. O, jao, en op énde van de straote, dao weunende ’n oud vintje. Die kwaom ’s aoves mee de koppejaoger nao buuten. Daoran ‘ieng ’n ouwe slunse en zô verjaogende die de zwaoluws. Zô tegen d’n aovund, tussen licht en doenker, deed ie dat.

Mêêster Maos dêêlende papieren uut, waorop me mosten invullen wao die nisten zaoten en ‘oevee.

Toen alle straoten waoren verdêêld, bleven d’r nog wat polders over. Saomen mee m’n kammeraod Wim, kregen me de Beukels- en Koninginnenpolder.

Melken

Bie Cuelenaore kwamen me in d’n achtermiddag in de koejestal. Dao wier net gemolken. De bezinne, (jao zô noemende wudder katholieke boerinnen) was ’n klein vrouwtje. Ze was an ’t melken. De bovendeure stoeng open. ’t Was een laoge stal mee wel vuuftien koeien. ‘k Zie de bezinne nog zitten op d’r blokstoel mee ’n immer tussen d’r kniejen. Me stoengen op de bochtstraote en de zwaoluws vlogen raokeliengs langs ons deu ’t deurgat. De stal in. ’t Leek wel of de kromme balken van de zolderieng vol zaoten mee zwaoluwnisten.

Wim goeng nao binnen. Die was gewènd mee koebêêsten om te gaon. Die weunende op ’n boer’of. Ikke nie. Ik weunende in de binnen. Ik bluuf buuten staon om de nisten op te schrieven en Wim tellende binnen. Meschiens wel twintig nisten. Mao joeng toch.

Naschrift: Vermoedelijk was deze telling onderdeel van een jaarlijkse actie die de Natuurvereniging in West-Zeeuws-Vlaanderen toen organiseerde en daarbij alle scholen inschakelde.